Ui nu hur hunbi!

Ui la vulh ngai lo vulh thar zingah a nu vulh kan awm fo a, chuvangin kan ui nu te hur hunbi hi kan hriat ve a pawimawh hle awm e. Ui chi a zir leh a ui hriselna a zirin danglam thei mahse American Kennel Club in an khaikhawm dan hi i han bihchiang dawn teh ang.

Engtik ațangin nge a hur țan țhin?
Mizo ui chi inthlah hunlai 'hur' tia kan sawi mai hi a sapțawng zawng chuan 'Estrus' emaw 'Heat' emaw an ti mai țhin a, 'heat' tih hi khawvel pumah chuan hman tlanglawn zawk a nih hmel.

Uite chi (Smaller breeds) ho hi chu thla 4 lekah pawh an hur țan theih laiin ui lian chi (Giant Breeds) chuan an hur hmasak ber hmang tur hian thla 18 ațanga thla 24 thleng hial pawh hun an mamawh thei thung a, chutih rualin ui hi a tlangpuia lakin thla 6 an nih ațanga hun țan an ni tlangpui thung. American Kennel Club hi chuan an hur vawi khatna leh vawi hnihnaah hi chuan rai tir miah loh tur an ti hmak mai! A chhan chu an hur vawi thumna hmalamah hi chuan ui ni chi kha no țha nei turin a la puitling tawk lova, no nei turin kha ui nu taksa khan a nih tur a la ni pha lo bawk.

Engtin nge a hur tih kan hriat theih ang?
I ui nu chu a hur a nih chuan amahah danglamna hran hran - a serh a rawn lian ang a, thi a nei ang a, a hma zawng aiin a hlauthawng hmain ri hlekah a beng a tun nghal hru zel ang. Chu mai ni lovin ui pa zinga awm nuam a ti ang a, in awmna a zirin a pain an rawn hel viau thei bawk. A ngum bawr vel tipohin a mei pawh a taksa sir lamah a lek ang. Ui zawng zawngah a lan dan in ang lo mahse heng ațang hian i hrethiam mai ang.

A hur hunchhung engtia rei nge?
Ui hur hun chhung hi a tlangpuiin kar 2 ațanga kar 4 lai a ni tlangpui a, chu aia rei leh chu aia tawi pawh a ui a zirin a ni thei. Amaha danglamna lo lang ațang khan a tawp hun chu i hrethiam mai ang. A hur hunbi țantirh hi chuan ui nu țhenkhat chuan ui pa a la dawngsawng phur vak lo mai thei a, a țhenkhat erawh hur hunbi chhung zawnga phur deuh harh pawh a awm tho.

A hur hunbi chhungah pawh hian rai theihna chance a ngah lai bik a la awm leh cheu a, chu hun chu a rei lo hle a, a hur țan ațanga ni 9/10 ațanga ințan in ni 5 chhung vel a awh țhin. A hur hunbi tawp thlengin rai thei vek mahse hemi chhung hian ui pa chi an la fuh sam ber a ni.

A hur hunbi hi engtik kar danah nge a neih?
Ui nu hi vawi khat a hur tawh chuan, hur hunbi mumal nei turin ui țhenkhat chuan thla 18 lai te a duh thei nain țhenkhat erawh hunbi nei nghal mai pawh a awm bawk. Hunbi mumal a neih hnu chuan thla 6 danah a hur deuh chat chat tawh mai țhin. Chuvangin a hur țantirh lam hi chuan lo chhinchhiahpui a țha khawp mai.

Uite chi (Smaller breeds) țhenkhat chu hur zing deuh erawh a awm a, thla 3-4 dan leka hur hunbi nei hial pawh a awm. Chutih laiin ui lian chi (Larger breeds) Irish Wolfhound, St. Bernard leh Great Dane ang chi ho hi chu thla 12-18 dana hur chauh te pawh a awm. Mihring ang lovin ui nu te hi chuan hur hunbi hi an damchhungin an nei chho a, amaherawhchu an upat chhoh zelah an hur hunbi kar hi a zau telh telh thung niin an sawi.

Kan hlawkpui ngei beiseiin i duhtawk leh phawt mai ang..

Ui vulh nuam vek u..