GSD Club of Mizoram
Hmanni khan German Shepherd Dog chungchang kan bihchiang tawh a. GSD ngainatute tana hriat atana țha leh țangkai tur - GSD Club of Mizoram chungchang hi kan la hriat loh takin i han hrut leh zuai zuai dawn teh ang.
State pawn ațanga chahluh ngai lovin Mizoram chhung hmuntin hmun tangah GSD hi a no lâk tur chu a awm ve zel tawh a. Mahse vawiin thlenga kan mutan chu 'pure breed' hlutna vawnhim hi a ni. Man man taka ui no hralh duh luatah atu mai pawhin 'pure breed' zawrhin an zuar țheuh a, mahse an chi chhui let ngam a ni ngai lo. Mi tam takin chu chu an tawng sual tawh a. GSD pure leia lei, a lian tulh tulha a pure lohzia chiang tulh tulh nei te pawh kan awm. Lang leh mai thei turah pawh kan hlawkna tur a nih chuan dawtsawi kan hreh si lova, lang leh mai tur lovah chuan kam hreh dawn lo nasa lutuk. Chu chu hre ranin he pawl hian hma a la ta chat a ni.
I GSD kha a thlahtute chhuilet ngamsak khawpa la fir țha a nih a, he pawl hi i la hre fuh lo a nih chuan țan ho theihdan tur kawng zawngin lo be pawp vat la, Mizoram chhung ațanga GSD Pure i lei duh a nih ngat phei chuan anni hi be pawp ngei ngei rawh. Social Media kaltlanga GSD pure no zuar tam zawk hi chu an thlahtute chhui let ngam a ni kher lo mai thei a nia.. Chuvangin kan himtlanna atan pure țha vulh mek te leh pure no duh ten he pawl hi kan belh zel a, an tha kan tihchak sauh sauh khan GSD chi fir he rama humhalhna kawngah hma kan la ve tihna a lo ni reng mai dawn a ni..
Chutih rualin hetiang taka ui Breed dang vulh zingah a pawl anga Breed humhalh tura ding kan awm emaw, kan hria emaw a nih chuan inhrilh hre zel ta ila, kan la ziak zel turah pawh ngai ang. Kan la din ve lo a nih phei chuan kan ui hlutna hum tura din ve vat chi a nih hmel hle bawk..
CLUB KALPHUNG
GSD Club of Mizoram hian thil tum mumal taka duan sa a nei thlap a, chungte chu:
(a) German Shepherd Dog (Alsatian) dik (pure) leh quality țha mi ten an lo hriatzau zel theih nana kawng hrang hranga hma lak.
(b) Pawl emaw mimal, German Shepherd Dog a tui mi te nen a thawhhona țha zawk neih leh thawhhona țha siam zel.
(c) Kennel Club of India in German Shepherd Dog a hrilhfiaha a pawm dan chauh hi German Shepherd Dog nih dan tur leh tehkhawng awm chhun ani tih member te, breeder te leh judge te hnena hriattir.
(d) German Shepherd Dog hi humhalh a nih zel theihnan intihsiakna (conformation) te, thawhhona te leh thil tih chi hrang hrang Kennel Club of India leh the German Shepherd Dog Club of
Mizoram inkaihhruaina (rules and regulations) hnuaia buatsaih.
(e) German Shepherd Dog hming hmer tel theihna lam hawi thil reng rengah a tul anga hma lak zel.
He Club hi a thil tum te piahlamah pawl leh mimal hlawkna atana hman tur a ni lova. Țanpuina a khawn leh dawn te chu mimal hlawkna atana hman tur a ni lo.
He Club member te hian he inkaihhruaina dan hi pawmin, hun leh thil tawn dan zir zel in he dan hi an enlet thin ang.
MEMBERSHIP CHUNGCHANG
He Club hi a dinna rei ve tawh ang reng mahse mahni intarlan tum pawl a lo ni lem lo bawk nen member lam hi chu an pung chak vak lova, an duhfir em avang hian punhluai theih pawh a ni bawk hek lo. GSD pure nei nazawng te an intahluh ngam loh fo nachhan pakhat chu an ui pure lohzia hriatchhuah an hlauh vang te pawh a ni ve thei tho bawk. (Ani kher e ka tihna ni lovin thil ni thei kan ngaihtuahna tizau atan..)
Membership Registration hi kum 1 atan Rs. 100 a ni a, chumi bakah chuan ui pakhat zelah Registration hi Rs. 50/- an chawi belh ni awmin an sawi a. A nih chuan GSD pakhat vulh tan chuan Rs. 150/year a ni tihna a nih chu. Chumi bakah chuan lifetime membership an siam leh a, lifetime ah hi chuan Rs. 500/- a ngai thung.. Tunah hian Member ni lai mek (membership fee pe) hi mi 32 lai an awm ve.
ENGTIA LO DING ȚAN NGE A NIH?
A tirah chuan GSD vulh zinga a innel zual te'n 'GSD Show Lovers' Whatsapp Group an siam a. Inpawhtawn takin engkim an sawihovin an in share tawn a, țhahnem an ngai tlang țhin khawp a. Show a tel a hmasawnna tur te an sawiho thupui ber a ni thin a. Cross Breed tam ta lutuk hi pawi an ti tlang hle a (cross breed an hmuhsit vang lam ni lovin a pure lei duh ngei ngei pawhin cross an lei phah nawk nawk ta fo mai si hi a bulpui ber a nih ngei hmel), GSD hlutna ti tlahniamtuah hial anni hi chuan an ngai hmak. GSD promote țha an lo ti tlang bawk nen club din an rel chho zui ve deuh tawp a. Nikum August vel khan GSD Meet neiin chumi hnu chuan OB leh Committee Member te an inruat chho a, an kal chho ve bek bek zel a la ni. Kuminah inthlan țhain membership fee te lak nghal a ni bawk a. Tin, motto ah pawh "To promote GSD in Mizoram" tih an hmang bur mai a ni. An motto hian an pawl kalphung tur chu a tifiah mai awm e..
Club Member tam zawk phei hi chu chhungkhat ang chiahin an innelin an inpawh a. Eng emaw hlekah pawh an in ko phar tak dawr dawr a. Ui damloh chungchangah phei chuan mi 4/5 talin an in tawiawm hman deuh ziah niin an sawi bawk. Chhiat țhatah pawh an in thlamuanpui tawn tlang hle a. Chutiang khawp chuan he pawl hi 'GSD' avanga phuarkhawm niin an sawi.
TUTE NGE TUNA HRUAITUTE!?
Member kan ni ve duh emaw, GSD pure no lâk tur kan zawng emaw, thil dang dangah pawh he pawl hi biakpawh kan duh thei si a tih thuah tuna an hruaitute leh a biak pawh theih dan tur pawh hei ka rawn zep tel nghal e..
President:
George Rodingliana, ITI Veng
📱9612433081
Vice President:
Lalchhanhima, Armed Veng South
📱 8974558771
General Secretary:
V.L. Nunhlima Chhangte,
Tlangnuam Vengthar
📱 9436706735
Associate Secy:
George Lalduhawma,
Bethlehem Vengthlang
📱 9862136605
Associate Secy:
F. Zothanmawia, Kulikawn
📱 9862880047
Financial Secretary:
C. Rosiamliani, Chawnpui
📱 9856280326
Treasurer:
Lalchhanhima, Dawrpui Vengthar
📱9774003866
FB Account: https://www.facebook.com/gsdclub.mizoram.9
Kan hlawkpuia kan sawtpui ngei beiseiin i duhtawk leh phawt mai ang. Chutih rualin an chanchin ka hriat duh apiang min hrilh nghal zat zat thei khawpa pawl nung leh an chanchin ka ziah min phalsak khawpa inhawng he pawl 💁 GSD Club of Mizoram te chungah lawmthu ka sawi nghal bawk e.
Ui vulh nuam vek u.. ☺
Comments
Post a Comment