Ui i vulh ve a nih chuan..

Heng thu vawiin thlenga ziah a la ngai hi a buaithlak khawp mai.. Vanduaina hi chu tu chungah pawh thleng thei a ni a, intihpalh pawh hi awm thei a ni. Chutih rualin vanduaina leh intihpalh (chetsualna) a kan ruat thil tam tak hi fimkhur tâwk loh vang a ni ve thei si a tih thuah tlem..

Ui chu:
1. A len em avangin venghimtu țha a ni ngawt lova, ven thiam huaisen ni tura zirtirna vanga venghimtu ni thei a ni.

2. A breed a țhat em avanga fing a ni lova, zirtir țhat em vanga fing zawk a ni.

3. A man a to em avangin chhuantlak a ni ngawt lova, thu a awiha a finna vang zawka chhuanawm a ni.

4. I ui a nih vanga inchhuanna tham ui neih i duh chuan a pu/pi i nih avanga a vanneihna i hmuh hmasak tir a ngai a ni.

5. I ui vulh lakah a pu/pi anga i nun chuan a pu/pi hliah hliah ang che a; a duh duh i pe a i hlui zat zat a, a duhdan apianga i awm tir zel a nih thung chuan a chhiahhlawh chei let hlauh ang che.

6. Ui chu eng ang pawhin man to mahse, eng ang pawhin duatin hmangaih mah la, a zun leh ek kha midang tan a hnawksak fova, a thahrui leh a ngho hriam khan mi pawi a sawi fo chuan, mi thinrimna leh anchhia phurh tirtu che a ni daih thei.

7. Zalen taka awm tura i duhsak vanga i ui i khuahkhirh loh khan i țhenawm khawvengte nun ticheptu i ni thei a, țha taka ui enkawla khuahkhirh țhin ten an ui a kawlha a huaibak lohna tura an walk puia an sawizawi țhin kawng daltu i ni thei.

8. Ui vulh hi hun rei tak atana tanina luh ang deuh a ni a, i tan pui tur i thlan uluk loh chuan a hlimawmna i pawh pha ngai lovang.

9. I ui chu a nalh em avang emaw, a len em vang emaw, a breed a pure em vang emaw, a man a tam em avang emawin lo inti thei mai suh. Ui hlutna hi chutiangah ni lovin i thinlunga i ui i hlutna kha midanginn an țawmpui leh țawmpui loh cheah zawk a ni a awm ni.

10. A chhe ber dinhmun thlen palh awm thei a ni a, ui aiin mihring nunna hi a hlu tih hriatreng a țha. Chu chuan mitin fimkhurna min pe nge nge si a.

Heng hi mi rilru hliam tumna lam ni lovin, ui vulh dan kawnghmang dik zawk inzirtir tumna lam zawk a ni e..

Ui vulh nuam vek u.. ☺


Comments

Popular Posts