Rottweiler

Sawi tawh angin he page hi mithiam leh expert te tan a ni lem lova, bangbo zawkte tan, an ui vulh leh awh zawng chanchin an lo hriat theihna atan leh a enkawl dan hmang te an lo thiam zawk theihna a nih beiseiin internet lama ka thu chhiar ho vawmkhawmna atana ka siam mai a ni a. Chuvangin ui lo vulh reng tawh, lo inbihkual nasa fe tawh tan chuan hriathnu vek leh hriathnu ai pawha chiang lo zawk te pawh a ni mai thei. Mahse, a bangbo zawkte tan erawh a hlawkthlak ngei ka beisei..

Rottweiler hi ranvulh vengtu atana hman țhin ui chi zinga a upa ber pawl a ni a. An sawi dan chuan a chanchin hi Roman Empire hun thlenga chhui let theih a ni an ti! Chuti a nih chuan kan hnam - Mizo chanchin aiin a chhui let thui theih fe tihna a ni!

Rottweiler hi a zir mi te rin dan chuan Roman Empire hunlaia an ranrual khalha vengtu ui chi thlah kal zel te an nih hmel a, mastiff ang maia pianphung nghet țelh țawlh nei, chak leh rintlak tak, chhel leh fei em em, fing tak leh venhimna kawnga finna ngah tak a ni.

Roman Empire in Europe awpbet tura a beih țan lai khan, an sipai te Europe khawmualpui hmun hran hranah a huhovin an zin dul dul țhin a. Refrigeration te la awm ve hek lo, sa an ei châk dawn chuan talh tur kha an hruai tel a ngai fo țhin. Chutianga ran an hruaite hruai tur leh veng tur chuan mihring tha tihek lovin rankhalhtu ui (drover dog) an hmang mai țhin a ni.

A.D. 74 na bawr vel ațang khan Rome sipai te hian tuna Germany chhim lam ni ta a Alps tlangdung hi an paltlang țhin a. A hnu kum 200 hnu thlengin, Rome lalram tlawmhnuah pawh Rome sipai ho ui (drover dog) ran vengtu leh an hralhna tur hmuna khalhtu atan an la hman chhunzawm ta zel a ni.

Helai hmuna khaw pakhat chu a hmingah Rottweil sain sumdawnna hmun pawimawh takah a chang chho a. An sumdawnna pakhat ran vulh leh hralh chungchangah hian ui chi țha leh țangkai a nihzia tarlan a ni chiang hle a ni.

Middle Age hunlai khan chu ui chi țhatna chu hriain sa/ran talhtu (butcher) ten an tan talh tur vengtu leh khalhtu atan te chhawrin tirhkah takah an nei chho zui a. Chung thil vang Rottweiler Metzgerhunds emaw butcher dog tia hriat hlawhzui ta niin an sawi.

Khawvel changkannain motor leh rail a chhawpchhuah hnu khan Rottweiler mamawhna hi nasa takin a tlahniam chho ta, a chi a mang telh telh a, kum 1882 a Heilbronn a dog show ah phei chuan he ui chi aiawha inlan tur pakhat chaurau zet chiah zuk awm tawh a!

Indopui Pakhatna a lo chhuah khan ui chi țha mamawhna a lo sang thar leh a, Rottweiler pawn ngaihhlut leh ngaihsak a hlawh thar leh a, hei hi mi tamtakin Rottweiler chi rem lohna chhan bulpui pakhat an tihial! Indopui Pahnihnaah phei kha chuan Rottweiler hi thu inthawnna atan te, hliam hnuktu atan te, hnu chhuitu leh vengtu atan mai bakah kawng hrang hrangin an chhawr țangkai hle niin an sawi.

Kum 1914, January ni 13 khan Germany a Rottweilet Club hmasa ber - The Deutscher Rottweiler-Klub (DRK, German Rottweiler Club) chu din a ni a. Kum 1915 April ni 27 khan Süddeutscher Rottweiler-Klub (SDRK, South German Rottweiler Club) pawh a rawn dingzui ve leh nghal a. DRK khian Rottweiler 500 vel an neih laiin SDRK khi chuan 3000 lai an nei thung a. A tam zawk nafam chu khawvel pum huap pawlah a chang chho zuiin hun kal zelah he club hi International Rottweiler Club (IRK) ti a thlak chhoh a ni ta a ni. Pakhatah chuan DRK hi chuan working dog tihpun ngawr ngawr an kalpui vang te pawh a ni thei bawk ang. Chutih laiin SDRK khi chuan chhawr theih piah lamah a ui pianphung nen lama an thlur vanga lo lian ta zawk pawh a tih theih awm e.

German Rottweiler Club hran hran te chu kum 1921 khan insuihfinin Allgemeiner Deutscher Rottweiler Klub (ADRK, General German Rottweiler Club) a lo ding chho a. Kum 1924 January ni 27 khan sorkar pawmpui Club ni turin Stuttgart district court ah an in register ta thlap a ni. Vawiin thlengin khawvel pumah ADRK hi 'home club of the Rottweiler' an tih phah ta reng a nih hi.

Kum 1931 khan American Kennel Club chuan Rottweiler hi ui chi (breed) khat atan recognised a. Kum 1936 khan Britain lamah Crufts ah phochhuah a ni ve leh a. Kum 1990 vel phei kha chuan a lar ber lai tawngin American Kennel Club hnuaia ui register tam ber a ni hial a. Kum 2013 khan American Kennel Club hian United States a ui chi fir (purebreed) lar dan a thlannaah Rottweiler hian 9-na a hauh a ni.

Rottweiler hi kum 8-10 vel dam anga chhut a ni a. A rawng hi a dum leh a buang uk (tan) emaw a dum leh mahagony a ni tlangpui a. A tlangpuiin a pa hi 61-69 Cm vela sang niin 50-60 Kg vel a rit a ni tlangpui a, a nu hi 56-63 Cm vela sang niin 35-48 Kg vel a ni tlangpui țhin. Mahse kan rama kan hmuh phâk te hi chuan environment leh thildang dang vangin rihzawng leh lenzawngah hi chuan an pha lo deuh thei tho bawk.

Rottweiler hi pu emaw chhungte hre em em mai, thuawih thei, rinawm tak leh chhawr țangkai theih tak a ni a, an dam dap nain an huaisen em em a, an vela thil thleng hi an chik hra reng mai țhin. Chu mai ni lovin herding instinct an neih piahlamah an chak em em mai bawk si a, chuvangin ngaihthah tur tana ui vulh chi loh ber pawl niin an sawi țhin.

Expert te chuan Rottweiler hlauhawm zawnga khawsa te hi chu a neituin a neitu dinhmun a luah zawh loh vang a ni an ti ve tlat thung. Tih duhdah lutuk vang te, ngaihthah vang te leh mipui vantlang zinga khawsakpui ngai lohin a rahchhuah a niin an sawi. Chuvangin Rottweiler vulh reng reng tan thatchhiat a thiang lova, munal taka zirtirna pek leh  a tam thei ang ber venna hnuaia mipui zinga khawsak tir ngei ngei chi niin an sawi bawk.

Ui vulhtu tam takin engtia enkawl tur nge, engnge an zia, engnge an mamawh, engmah chik hmasa lova kan nalh tihzawng leh awhzawng, a man tur kan neih vang maia kan lei ve tawp țhin hi a pawi a. A pawi tih piahlam pawh thlen thei a nihzia hi i hre thar mawlh mawlh teh ang u. Ui hi a chhungte tan zaidam sa teh mahse, midang tan chuan ralțit phah tham hial a ni si a..

Eng ui pawh vulh ila - vaccine a hun taka lakpui, kan ui vulh chi (breed) chungchang zirchiana mumal taka zirtirna pek, sawizawi, thunun leh khuahkhirh hi kan chanpual, kan tih makmawh a nihzia hi i chiang thar deuh deuh zel ang u khai..

Ui vulh nuam vek u.. ☺