Pug
Dan ngaitein hei bawk hian bul țan a ngai leh țhin, ui chanchin zir mi ka ni lova, a enkawlna kawnga thiamna nei ka ni hek lo. Mahse chuvang tak chuan ka ui vulh enkawl dan ka thiam theihna atana a chi (breed) chungchang ka zirchian a ngai a, an zia leh duhzawng, duh loh zawng thlengin ka chian a ngai. Ka ui enkawldan ka thiam theihna'n..
Chuvangin ka chhiar ang ang te, a chhiar fu ve lo te leh a hrethiam lo te tana ka chhawpchhuah hian mi tu emaw talin hlawkna leh sawtna a lo neih takin tiin he page hi siam pawh ka ni a, a hre sa te pawn in lo hrethiamin ka ziahbak sawibelh ngai pawh comment lamah in lo belh zel mai dawn nia..
Pug hi ui chi (breed) pakhat, tereuhte mai, sanghet tlet tlawt leh chuar tip tep, hmai dung tawi luata mihring ang maia phek lek lek, mei tawi te vial tap mai nei a ni a. A lawm tan chuan lawmawm tak tur a ni. Sazuk no rawng ang taka buang uk dal deuh (fawn) a ni tlangpuia, mahse American Kennel Club chuan a dum pawh he breed ah hian a pawm tel a, Canadian Kennel Club phei chuan a dum, theite rawng (apricot), sazuk no rawng (fawn) leh silver pawh a pawm vek thung.
Pug hi mipui zingah pawh tal tir ngam khawpa ui zaidam, enkawl nuam tak a nih avangin vawiin thlengin khawvel milar ho zingah pawh vulh an la intihhmuh viau mai zawng a nih hi. Kum 2004 a World Dog Show ah phei chuan Show a ui țha berah Pug hi thlan a ni nghe nghe.
Pug vulhtu tam tak pawhin an chik lem loh leh hriat loh fo chu GSD ang deuh tho khan an beng awmdan a zirin chi hnihin - Rose & Button in a țhen theih tih hi an ti! Rose ears ho hi Button ears ho aiin an te zawk a, an beng hmawr hi an lu sirah a inthlep țhin niin an sawi.
Pug pawh hian țobul a nei upa deng deng hle mai a, Mizo te ang bawka chhakchhuak a ni. Hmanlai chuan China-ah lal chhungkaw hoin an vulh țhin a, Chinese Emperor te khan an hlutin an ti nuamsa țhin hle niin an sawi. Ui mai mai an ti ve ngawt lo deuh a ni ngei ang a vengtu turin an sipai te an detail hial țhin niin an sawi! Hun a lo kal zel a, Asia khawmualpuiah a lo darh zel a. Tibet rama Bhuddhist puithiam te pawn an monasteries ah hial te pawh an lo vulh ve țhin a ni awm e. Mahse chuti chungin engtiang chiaha lo piangchhuak nge a nih chiang taka ziak hmuh tur erawh a vang ang reng hle.
Chutiang taka lal chhungkua leh puithiam ten an hlut tak chu Asia ațangin Europe lamah lakluh a ni a. Kum 1572 ah khan pug pakhat 'Pompey' an tih chuan Orange lal fapa chu amah tihhlum tumtu te lo kal thu a lo hrilhhriat avangin European Courts, House of Orange phei chuan Official Dog ah an hmang ta hial a ni.
Awihawm loh deuh maiin hetih hunlai bawr vel hian sipai lamin ransa leh mihring hnu chhuitu atan leh vengtu atan an chhawr țhin an tih teh tlat chu!
Kum zabi 18na lai vela English painter lar em em mai William Hogarth pawh kha Pug chi hran hran vulh țhin a ni a. Kum 1745-a ama lem a ziah (self-portrait), tuna London's Tate Gallery-a an dah tâkah pawh khuan a pug vulh, 'Trump' tia a koh țhin chu a lang ve nghe nghe a ni. Kum 1789 vel phei kha chuan fashion a sang ram Italy ah he ui chi hi a lar thlu ngang ni tur a ni, Mrs. Piozzi pawn a thuziakah sakawr tawlilir tin maiah pug hmuh tur a awm thu a lo ziak daih tawh a. Josephine pawh khan Napoleon Bonaparte a neih hma daih khan pug 'Fortune' chu tanin ațanga a chhungte lehkhathawnna atan te a lo hmang daih tawh te an la ti tak deuh deuh.
Kum zabi 19-na ah khan Queen Victoria lal ram England ah pawh a lar vet vet hle niin an sawi a. Amah ngei pawhin a ui no neih ngei - Olga, Pedro, Minka, Fatima leh Venus te a vulh duah mai a ni awm a sin. Lalnu berin ui a ngainat em avangin kum 1873 ah phei chuan Kennel Club a lo din phah ta hial a. Queen Victoria hian Pug ah pawh theite rawng (apricot) leh sazuk no rawng (fawn) hi a ngaina hle niin an sawi. Amah vang hian lal chhungkaw dang pawn pug hi an ngaina chho ve ta nual reng a, chunh zingah chuan a fapa King Edward VIII leh a tupa King George V te pawh an tel nghe nghe.
Kum zabi 18 leh 19 chhoa an lemziak leh thil ker vela pug hlimthla hmuh tur awmah te erawh tuna kan pug hriat ai hian an bawp a la sei zawk a, an hmaidung (hnar bawr) vel pawh hetiang ang em emin a la tawi lo. A țhen phei chu an beng pawh a te zawk hle. Tuna kan Pug hmelhriat ang tak hi chu 1860 vela China ațanga an chah luh leh țeuh hnuah khawvelin a hmelhriat chauh niin a ngaih theih. He an pug chah luh hi chu bawptawi leh hmai dung tawi a ni ve tawh. British aristocrat Lady Brassey pawh kha Pug dum ho vanga hriat hlawh hat a ni a, ani pawh khan 1886 vel khan China ram ațangin pug hi a lo lei tawh a ni. 1895 ațang chuan an beng tih tet sak (cut/crop) pawh phal loh chhoh a ni ta a ni.
Pug hian kum zabi 19-na ah United States hi a lut ve chauha ngaih ni mahse a lar châk hle thung a. In hrang hrang leh show hran hranah a hmel hmuh tur a awm chho zui zut a. Kum 1885 khan American Kennel Club pawn recognized breed ah an pawm ta mai reng a. Kum 1931 a lo her leh meuh chuan American Kennel Club te hian The Pug Dog Club of America an din ta hial a. Kum 1981, Pug pakhat Woodchuck chuan Westminster Kennel Club Dog Show, United States a neihah pakhatna a hauh ta nawlh mai a, he ui hi Pug he show țan tirh - 1877 ațanga pakhatna ni thei hmasa ber a ni. Kum 2004 khan Rio de Janeiro, Brazil a World Dog Show an neihah Cinoblu pug chhuanvawr Double D chuan pakhatna a lo hauh vang tawh bawk.
Chutiang khawpa ui fing thei, chuti khawpa a thlah ang chuan lal chi leh kuang te nena lo inhnim hnai ui dang hi an tam lo mai thei. Chuvang te pawh a ni mahna "Hmelchhiat a zawngah Pug tluka hmelchhiat thiam an awm lo.." an lo tihfiamthu hial țhin tiin i duhtâwk leh phawt mai ang..
Ui vulh nuam vek u ☺
Comments
Post a Comment