Ui vulh ve i tum a nih chuan..

Ui vulh reng ni mah ila a enkawl dan chungchang hi ka bangbo ve khawp mai a, chuvangin internet lamah ka hunawlah hi chuan ka theih ang angin ka chhiar kual ve țhin a. Hma ka la sawnpui lutuk lo nain chhiar loh ai chuan hma ka sawn ve hret hret niin ka hria.. Chuvangin he post pawh hi ka irawm chhuak ni lovin ka thu chhiar hrang hrang te ațanga ka khaikhawm a ni mah a. Ui la vulh ngai lo, vulh țan tur te tan bik deuh a ni a. Kei anga bangbo zingah hlawkpui leh sawtpui an lo awm tâk mialin..

Ui vulh țan i tum a, i vulh tur chi (breed) thlan dan i thiam lo a nih chuan a pui thei mai thei che lo chhiar ve mah teh. Tin, i awh zawng, i lei theih vanga i vulh ve ngawt khan kha ui tan khan harsatna pawh i lo thlen ve thei reng tho a nia..

Ui damchhung hun hi kum 7-14 vel bawr a nih tlangpui avangin ui vulh tura thutlukna hi hun rei tak awh tura thutlukna a ni a, chuvangin phur hluai leh phur thut thil vanga vulh ve ngawt hi duhthlanna atthlak a ni a. Chuvangin ngunthluk taka duhthlanna siam tura zirchian hmasak hi tihmakmawh thil a ni.

Ui vulh i tum a nih chuan uiin an mamawh langsar deuh thil pathum ațang hian nangmah lo in exam phawt teh.

1. HUN: Ui i vulh a nih chuan mathei lova a mamawh tur chu i hun a ni. I buaipui hman dan a zir leh i peih leh peih loh dan a zira a breed thlan i uluk khan i ran tan malsawmna i ni thei. Bawlhfai te, walk pui a excer lakpui te, a fin theihna tura zirtir te, a hun taka vaccine lakpui etc ang te leh i chauh ngawih ngawih châng pawha i ui țhatna tur leh himna tura i tih ngai te kha lo chhut ta vang vang la..

2. HMUN: Ui hi a tlangpuiin tha za tak tak, zalenna mamawh tak an ni tlangpui a, chuvangin han sapatal kual vel a, duhtawka lim kualna tur hmun an mamawh deuh ngei ngei a. Chu chu in inah a hmu thei dawn lo a nih chuan chiang sa chu i venna hnuaiah i sawizawi fo a ngai dawn tihna a ni a. Point no 1 khi i mamawh belh leh zual ang. Mi țhenkhat chuan an compound an hung chhuak vek a, țhenkhat chuan an hung lem lo. Țhenkhat chu kawngka khar ngai mang lo an awm a, țhenkhat chu inkhar țhiap reng pawh an awm. Chung zawng zawng chu uiin hmun a mamawh a hmuh theih dan tur hriltu a nih theih avangin i in leh a vel lo mitthla ta la

3. SUM: Eng ui pawh vulh la, Siamtu'n mi a pek bak khawvelin kan nitin mamawh phuhru tura mi a pek theih te hi chu lei ngai a nih miau avangin sum hi an mamawh vek dawn chiang sa. Mahse a breed leh ui hrisel dan a zirin an mamawh tam dan erawh a in ang vek lem lo. Chuvangin i budget mila ui vulh tur i thlan thiam khan ui i hmangaihzia a takin i lan tir zawk a ni. I thla bi lâkluh, i bank account leh i wallet lo mitthla teh le..

Heng point pathum hi dik taka nangman i chhang ngam a nih chuan i tana ui vulh tura fuh ber a hriat tawh ang a. I dinhmun a zirin vulh lo ngam hial tur pawhin a chawh mai thei che.

Entirna'n: Number 3-ah, sum ah hian lo buai lo pawh ni la, i ui hnenah Number 1 leh Number 2 khi i pe thei dawn lo a nih chuan Guard Dog ho chu vulh a fuh viau lo mai thei. Chuti chunga i vulh lui a nih chuan thlunna ngaia thlun reng a ni emaw a ni ang a, a puitlin hunah ngat phei chuan a luhlulin a kawlh hle ringawt ang a. Himpui atana kan vulh kha kan him loh phah thei zawk tlat..

Chutiang bawk chuan Number 1 leh Number 2 khi pe thei mah la, thawhchhuah i la nei si lo a, ui i ngainat em avangin vulh ngei ngei i duh si a nih chuan Zo ui fir (mi tam takin zo ui fir kan tih hi zo ui fir ni lovin tual ui nena thlahpawlh a ni tawh châwk tih erawh hre tel la. A fir hi chu thingtlang hmun kil khawr, uite buk chi takngial pawh an la vulh lohna khua ațanga chah a ngai ang) vulh tum thek ta la. He ui chi mang mek chhanhimtu i nih phah ang a. Tin, ui a zawnga enkawl sam ber, natna pawh kai ve zung zung lem lo a nih avangin i tan a fuh viau ang. A harsa tur ber erawh a no lâk tur zawn hmuh hi. Khawvela ui a zawnga instinct țha ber pawl, ressistance nei țha, rinawm leh huaisen zo ui hi vulh man a to lo a nia!

Eng ui pawh vulh ila, a hunbi dik taka vaccine lakpui hi a vulhtu mawh a nihzia erawh hmaih lo ta ila..

Tikhan kan hrethiam tawh maiin ka ring. Number 1-3 a mahni kan in X-ray zawhah dog breed character kan bih kual ang a. Chutianga kan vulh awm mi kan vulh a nih chuan ui ngainatu dik tak kan nihzia a takin a lang zawk ang a. Kan ran ten keimahni vanga an harsatna tawh theih an pumpelh ang a, kan țhenawm khawvengte pawi kan khawihpalh tur lak ata kan fihlim bawk ang.

Tin, ka sawi tel hram duh chu Guard Dog ho chi reng reng hi chu a lak hran theih hlimah, an tana pawi lo tur tawk sia a naupang thei ang bera lak hi a fuh an ti deuh zel niin a lang. Chumai ni lovin an sen laiin a theih hram chuan puitling venna hnuaiah naupang kara tal tam tir hian an puitling thlengin lukhawng a nei e an tih mauh pek chu..

A hre zawk te leh tawnhriat ngah zawkte sawi zui atan i duhtâwk leh phawt teh ang..

Ui vulh nuam vek u.. ☺